Օրեր
առաջ ավարտվեց կարևոր որոշումների, զբաղվածության, հետաքրքիր գաղափարների իրագործման,
անսպասելի անակնկալների և մրցանակներով լի 2015-ը, որ պահեց ինձ հաճելի լարվածության ու անհանգստության մեջ: Տարին սկսվեց «Դիջիթեք
2015» միջազգային ստուգատեսում «Ուսումնական նախագիծ» անվանակարգում գլխավոր մրցանակի
արժանանալով: «Տնտեսագետի» ակումբի` «Տնտեսական
միամսյակ» ուսումնական ստուգատեսը, ճանաչվեց լավագույն նախագիծ, իսկ մեկ ամիս անց տրվեց ստուգատեսի պաշտոնական
բացումը: Գիտեմ` այնքան
եմ պատմել, խոսել, որ հաստատ նոր բան ավելացնել չեմ կարողանա. կարծում եմ այն
դարձավ կրթահամալիրում իրականացված լավագույն
ուսումնական նախագծերից մեկը: Բայց մարտ ամիսը միամսյակով չսահմանափակվեց: «Տիգրան
Հայրապետյան» ամենամյա ստուգատեսի ընթացքում, բլոգավարության, ինչպես նաև քաղաքական
և տնտեսական նյութերի հեղինակման համար, կրթահամալիրը շնորհեց ինձ «Տիգրան Հայրապետյան»
մրցանակը: Սպասված և կարևոր մրցանակ, որ պատվաբեր է յուրաքանչյուր սեբաստացու համար.
շնորհակալ եմ: Եկավ ամառը, «Սինոփսիս» ընկերությունում ունեցած հարցազրույցը, դարձրեց
ինձ ՏՏ ոլորտում ՀՀ նախագահի մրցանակի արժանացած երկու սեբաստացիներից մեկը, իսկ արդեն
հոկտեմբերին մրցանակաբաշխությունն էր: Ամռան հաջորդ իրադարձությունը կրթահամալիրը` «Եվրոպական Երիտասարդական
Խորհրդարանի» կազմակերպած ֆորումում ներկայացնելն էր: Յոթ հոգուց բաղկացած մեր թիմը
զարմացրեց մասնակիցներին հատկապես դպրոցների ներկայացման փուլում: Հիշում եմ, թե ինչպիսի
ոգևորություն կար մեր ու մնացածի աչքերում, երբ էկրանին կրթահամալիրի մասին պատմող
ֆիլմն էր. հեծանիվներ, առողջ ապրելակերպ, ամառային դպրոցի լողորդ սովորողներ, ստուգատեսներ, մարմարյա սրահ: Կրթահամալիրյան առօրիայի ներկայացման ձևը գնահատանքի արժանացավ: Ֆորումին մասնակցելու
ընթացքում նոր ընկեր և ծանոթություններ ունեցա, սեպտեմբերին լրացրեցի անդամակցության
հայտը. այդօրվանից «Եվրոպական Երիտասարդական Խորհրդարանի» անդամ եմ: Ամառը հետաքրքիր էր նաև կամավորական աշխատանքներով:
Ես փորձեցի օգտակար լինել ոչ միայն Երևանում, այլև մարզերում. մեկնեցի Սևան, անդամակցեցի տեղի երիտասարդական
ակումբին, կամավոր դարձա
«Տերտերյանի ժամանակը» փառատոնի կազմակերպչական թիմում: Հոկտեմբեր, նոյեմբեր ամիսներին
զբաղված էի ամենօրյա դասերով, և դեկտեմբերին կայանալիք անգլերենի քննությանը պատրաստվելով:
Իրականում TOEFL քննությունը լեզու սովորել չսիրող և չզարգացած հիշողություն ունեցող
մարդու համար ահագին դժվարություն է: Ամերիկյան մոդելով կազմած քննությունը ստուգում
է միանգամից լեզվական մի քանի հմտություն` կարդալ, լսել, խոսել, գրել: Ես որոշեցի քննություն հանձնել յոթ
ամիս առաջ, և հենց այդ ժամանակ էլ սկսվեց ինքնակրթության անհետաքրքիր և երկար պրոցեսը:
Երբեք անգիր անել չեմ սիրել, բայց ստիպված էի սովորել երեսուն-հիսուն բառ ամեն օր:
Անկարողությունը մարդուն հնարամիտ է դարձնում. սկսեցի մեթոդներ մշակել, բառերը հեշտ
սովորելու համար, լսել մասնագետների և անգլերեն` որպես մայրենի խոսող մարդկանց խորհուրդները:
Այնուամենայնիվ մի քանի միավոր խանգարեց, որ
բարձր գնահատական ստանալու առաջադրանքը լիովին կատարված համարեմ: Չեմ
հուսահատվում. ինձ մի
անգամ ինձ ասել են` դեռ շատ սխալվելու հնարավորություն ունեմ:
Մերի Թելունց
No comments:
Post a Comment